दिलीप जैन.(पाचोरा)
दिनांक~१९/०८/२०२१

अनेकवेळा तक्रारी अर्ज देऊनही दखल न घेतल्यानेच बेमुदत उपोषण {अॅड. अभय पाटील.}

पाचोरा तालुक्यातील अनेक ग्रामपंचायतींमध्ये विविध योजनांच्या कामांमध्ये झालेला गैरव्यवहार तसेच अनेक ग्रामपंचायतींच्या दप्तरात अनियमितता व अफरातफर असे प्रकार आढळुन आलेले असतांना त्याबाबत अनेक गावांच्या ग्रामपंचायती विरुद्धचे पुराव्यासह केलेले तक्रारी अर्ज प्रलंबित आहेत.

तालुक्यातील ग्रामपंचायतींमध्ये दारिद्रय रेषेखालील यादीत झालेला घोळ, स्वच्छ भारत मिशन व वैयक्तिक शौचालयाचे लाभार्थींच्या योजनेत गैरव्यवहार पुराव्यानिशी दिसुन आला असतांना देखील पंचायत समितीचे गटविकास अधिकारी यांनी कुठल्याही प्रकरणांची चौकशी न करता सदर झालेल्या गैरव्यवहारातील संबंधितांना ते पाठिशी घालत असल्याचे यावरून दिसुन येत असा आरोप अॅड.अभय पाटील यांनी केला आहे.

गट विकास अधिकारी हे जबाबदार अधिकारी असतांना देखील त्यांनी कुठलीच कारवाई न करता या सर्व प्रकाराकडे हेतुपुरस्सर दुर्लक्ष करत असल्यामुळेच व अनेकदा त्यांना याबाबत पुराव्यानिशी तक्रारी देऊनही त्याचा काही एक उपयोग झालेला नसल्याने न्याय मिळण्यासाठी शिवसेनेचे उपजिल्हाप्रमुख अॅड. अभय शरद पाटील हे तहसिल कार्यालयासमोर बेमुदत उपोषणाला बसले आहे.

हे उपोषण दिनांक १७ ऑगस्ट मंगळवारपासून सुरु असून सेनेचे शहराध्यक्ष किशोर बारावकर, शेतकरी सेनेचे जिल्हा प्रमुख अरुण पाटील, पं. स. सदस्य ललित वाघ, नगरसेवक विकास पाटील.वडगाव अंबे येथील अॅड.मंगेशराव गायकवाड, वरखेडीचे डॉ. धनराज पाटील, फौजी संजय पाटील व गावागावातील असंख्य शिवसैनिक व ग्रामस्थांनी उपोषणकर्ते अॅड. अभय पाटील यांनी भेटी देऊन आपला पाठिंबा दर्शविला आहे.

पाचोरा पंचायत समितीचे गट विकास अधिकारी हे तालुक्याचे अधिकारी असतांना त्यांना पंचायत समिती स्तरावरील कुठल्याही विभागावर कारवाई करण्याचे अधिकार असतांना त्यांनी आपल्या कर्तव्यात कसूर करुन भ्रष्टाचार करणाऱ्यांना कुठलीच कारवाई न करता रान मोकळे करुन दिले आहे.

तालुक्यातील पिंपळगाव (हरेश्र्वर), नगरदेवळा, कोल्हे, डांभुर्णी, वरसाडे, भोकरी, कुऱ्हाड, लोहारा यासह अनेक गावांतील १४ व्या वित्त आयोगाच्या कामांबाबत लेखी तक्रारी पंचायत समितीकडे प्राप्त झालेले असतांनाही सदर विस्तार अधिकारी व गट विकास अधिकारी यांनी कोणतीही कारवाई या बाबत केलेली नाही, महात्मा गांधी रोजगार हमी योजनेतील घरकुल, विहीरी, शाळेला संरक्षण भिंत अशी कामे केलेली आहेत याबाबत पुराव्यानिशी तक्रारी अर्ज पंचायत समितीचे गटविकास अधिकारी यांना देवुनही अद्यापपर्यंत कुठलीच कारवाई झालेली नाही.

यासह तालुक्यातील राज्य शासनांच्या विविध योजनांमध्ये झालेल्या भ्रष्टाचाराची योग्य ती चौकशी करुन यात सहभागी असलेल्या पंचायत समितीतील विस्तार अधिकारी, ग्राम विकास अधिकारी व ग्रामसेवक तसेच या सर्वांना पाठीशी घालणारे पंचायत समितीतील भा.ज.पा. चे सभापती व सदस्य तसेच काही भा.ज.पा. चे जिल्हा परिषद सदस्य यांच्याशी संगनमत असलेले गटविकास अधिकारी या सर्वांची चौकशी करून दोषींवर त्वरित निलंबनाची कारवाई करण्यात यावी व यांच्यावर गुन्हे दाखल करुन सखोल चौकशी व्हावी या रास्त मागणीसाठी शिवसेनेचे उपजिल्हाप्रमुख अॅड. अभय शरद पाटील हे तहसिल कार्यालयासमोर बेमुदत उपोषणाला बसले आहे.