दिलीप जैन.(पाचोरा)
दिनांक~१५/११/२०२१

पाचोरा तालुक्यातील कुऱ्हाड हे गाव अवैधधंद्याच्या बाबतीत अग्रेसर असून मागील एक महिन्यापासून ग्रामस्थांच्या तक्रारीनुसार व प्रसारमाध्यमांनी दिलेल्या बातम्यांच्या आधारे पिंपळगाव हरेश्वर पोलिसांनी सतत धाडसत्र राबवून अवैधधंदे करणारांचे धाबे दणाणून सोडले होते तरीसुद्धा कुऱ्हाड गावातील अवैध धंदे थांबत नसल्याने ग्रामस्थ व महिलांचा संताप अनावर झाला असून उद्या ग्रामसभा असल्याने उद्या होणाऱ्या ग्रामसभेत अवैधधंद्याचे विरोधात ठराव घेण्यासाठी मोठ्या प्रमाणात मागणी केली जाणार आहे.

याची धास्ती घेत कुऱ्हाड गावातील अवैधधंदे करणाऱ्यांनी संघटित होऊन आज दिवसभर देशी दारूची दुकाने बंद असल्याने दिवसाढवळ्या गावठी व देशी दारूची विक्री केली तसेच कायदा आमच्या खिशात असून आम्ही कोणाला घाबरत नाही अशी शेखी मिरवत (कायदा आमच्या खिशात तर काय कुणाची बिशाद) असे डायलॉग मारून उद्या ग्रामसभेत जर कोणी अवैधधंद्याच्या विरोधात आवाज उठवला तर आम्ही त्याच्यावर व पत्रकारांवर कट कारस्थान करून खोटे गुन्हे दाखल करू अशी खमंग चर्चा करून गावात एक प्रकारे दहशत माजवण्याचा प्रयत्न करत आहे.

तसेच उद्या ग्रामसभेत जर आमच्या विरोधात कोणी आवाज उठवला त्यांची गाठ आमच्याशी आहे. आम्ही त्या लोकांनाही व पत्रकारांनाही पाहून घेऊ अशी दमबाजी गावात सुरू केली असल्याने उद्याच्या होणाऱ्या ग्रामसभेकडे सगळ्यांचेच लक्ष लागून आहे.

परंतु उद्या सावखेडा येथे एका जवानावर सकाळी ९:३० वाजता अंतिमसंस्कार होणार असल्याने कुऱ्हाड गावातील बरेचसे लोक या ठिकाणी हजेरी लावणार आहेत म्हणून सकाळी घेतली जाणारी ग्रामसभा सकाळी न घेता सकाळी ११ वाजेनंतर घेण्यात यावी अशी मागणी ग्रामस्थांनी केली असून या ग्रामसभेत अवैधधंदे बंदी साठी मोठ्या प्रमाणात मागणी केली करुन अवैधधंदे कायमस्वरूपी बंद करण्यासाठी ठराव केला जाणार असल्याने या ग्रामसभेत अवैधधंदे करणारे व त्यांचे हितचिंतक गोधळ घालण्यासाठी प्रयत्नशील असल्याने ग्रामसभेला पोलिसांची उपस्थिती असावी अशी मागणी होत आहे.