दिलीप जैन.(पाचोरा)
दिनांक~२८/०६/२०२१

पाचोरा तालुक्यातील कुऱ्हाड बुद्रुक येथे भरवस्तीत गावाच्या मध्यभागी एका इसमाचे घरावर अचानकपणे टॉवर उभारणीला सुरवात झाली असून या टॉवर उभारणीला संपूर्ण गावातील ग्रामस्थांनी आक्षेप घेत या टॉवरचे काम त्वरित थांबण्यात यावे अशी मागणी केली आहे.

हे टॉवर कोणत्या कंपनीचे आहे. या टॉवर उभारणीमागचा हेतू काय ? टॉवर उभारणीसाठी ग्रामपंचायतीकडून रितसर परवानगी घेतली आहे का ? तसेच घेतली असेल तर केव्हा घेतली, याबाबत संबंधितांकडे कोणतेही अधिकृत कागदपत्र नसल्याचे कुऱ्हाड येथील ग्रामस्थांनी सांगितले. कारण कुऱ्हाड बुद्रुक येथील सरपंच यांच्याशी विचारणा केली असता ग्रामपंचायतीने टॉवर उभारणीसाठी कोणतीही रितसर परवानगी दिली नसल्याचे व संबधितांनी कोणत्याही प्रकारे अर्ज केला नसल्याचे स्पष्ट केले आहे.

संबधीत टॉवर उभारणीसाठी आलेले कामगार व संबधीत व्यक्तीला याबाबत ग्रामस्थांनी वारंवार विचारणा केल्यावरही संबधितांनी खुलासा न देता टाळाटाळ करत मनमानी पध्दतीने जलदगतीने टॉवर उभारणीला सुरुवात केल्यामुळे कुऱ्हाड बुद्रुक येथी ग्रामस्थांनी संतप्त प्रतिक्रिया देत ग्रामपंचायत व संबंधीत विभागाकडे लवकरच तक्रार देऊन टॉवरचे काम बंद करण्यात यावे अशी मागणी करण्यात येणार असून हे टॉवरचे काम न थांबल्यास तिव्र स्वरुपाचे आंदोलन छेडण्याचा इशाराही दिला आहे.