विवाहितेच्या खूनप्रकरणी ३ अटकेत आरोपी पतीसह चौघांविरुद्ध खुनाचा गुन्हा दाखल.
दिलीप जैन.(पाचोरा)
दिनांक~०६/०२/२०२२
सद्यस्थितीत सगळीकडे अराजकता माजली असून महिलांवरील अन्याय, अत्याचाराच्या घटनेत कमालीची वाढ झाली आहे. यात जळगाव जिल्ह्यातील घटनांमध्ये वाढ झाल्याचे दिसून येते. यात बऱ्याचशा घटनांमध्ये अल्पवयीन मुलींवर बलात्कार, विनयभंग, पळवून नेणे, सासरच्या छळाला कंटाळून आत्महत्या तर कुठे महिलांचे दिवसाढवळ्या खुन होत आहेत. तर काही घटनांमध्ये खुन करून कुठे अपघात तर कुठे आत्महत्या दाखवून घातपात झाकण्यासाठी प्रयत्न केले जात आहेत.
ह्या घटनांमध्ये दिवसेंदिवस वाढ होत असल्याने कायदासुव्यवस्थेबद्दल शंका निर्माण होते. कारण कायद्याचा धाक राहिलेला नाही असेच म्हणावे लागेल. कारणही तसेच आहे. सद्यस्थितीत बऱ्यापैकी आरोपींना पाठीशी घालण्यासाठी रथी-महारथींंचा हस्तक्षेप, आपपल्या कार्यकर्त्यांना वाचवण्यासाठी धडपड व त्यातच काही प्रमाणात पोलिस विभागातील टंगळमंगळ कायद्यातील पळवाटा हे घातक मुद्दे आहेत. तसेच घटना घडल्यानंतर तपासकामी समाजातील व परिसरातील लोकांकडून सहकार्य, साक्षीपुरावे मिळत नसल्याने तपासाला योग्य गती मिळत नाही. हा मुद्दा महत्त्वाचा आहे. म्हणून आरोपी निर्दोष सुटत असल्याकारणाने गुन्हेगारीत वाढ होत आहे.
अश्याच एका घटनेत पाचोरा तालुक्यातील नाचनखेडा शिवारातील शेतात राहत्या घरातील पलंगावर मनीषा चेतन राठोड (२४) ही विवाहिता मृतावस्थेत आढळून आल्याने पाचोरा पोलिसात शुक्रवारी अकस्मात मृत्यूची नोंद करण्यात आली होती. परंतु मयत विवाहितेच्या नातेवाईकांतर्फे सासरच्या मंडळी विरोधात संशय व्यक्त करण्यात आला होता. शव ताब्यात न घेता घटनेची पोलीस प्रशासनास चौकशीची मागणी करण्यात आली होती. मृतदेहाचा पंचनामा करून जळगाव हलविण्यात आले होते. शनिवार, ५ रोजी मयत विवाहितेचा भाऊ ज्ञानेश्वर जगन्नाथ पवार (३२) (रा. कुंदाने तांडा, जि.धुळे) यांनी पाचोरा पोलिसात मयत विवाहितेचा पतीसह चौघांविरोधात
खुनाचा गुन्हा दाखल केला आहे. याबाबत सविस्तर माहिती अशी की ४ रोजी सकाळी ६ वाजेपूर्वी गाळण, विष्णुनगर भागातील नाचखेडा शिवारात असलेल्या शेतातील घरात आरोपी पती चेतन राठोड, छायाबाई राठोड, जयसिंग राठोड, भगवान राठोड (सर्व रा. गाळण, विष्णुनगर, ता.पाचोरा) यांनी मत मनीषा हिस क्रूझर गाडीचे हप्ते फेडण्यासाठी माहेरून पैसे घेऊन ये तसेच पती चेतन व जेठाणी यांचे अनैतिक संबंध असल्याचे मयत विवाहितेने पाहिल्याच्या कारणावरून चापटा बुक्क्यांनी मारहाण करून शारीरिक व मानसिक छळ करून गांजपाठ केला व जीवे ठार मारले, अशी फिर्याद मयत विवाहितेचा भाऊ ज्ञानेश्व पोलिसात दाखल केल्याने वरील सर्व आरोपींविरोधात गुन्हा दाखल करण्यात आला असून आरोपी पती चेतन राठोड, जयसिंग राठोड, भगवान राठोड यांना अटक करण्यात आली आहे. पुढील तपास पोलीस निरीक्षक किसनराव नजनपाटील यांच्या मार्गदर्शनाखाली पोलीस उपनिरीक्षक गणेश चौबे करीत आहेत.