दिलीप जैन.(पाचोरा)
दिनांक~०४/०९/२०२१

(लोहारा दुरक्षेत्र हद्दीतील कुऱ्हाड येथे गावठी हातभट्टीची निर्मिती व विक्री ही आसपासच्या दहा खेड्यांची डोकेदुखी बनली असून कुऱ्हाड गावपरिसात धाडसत्र राबविण्यात यावे अशी मागणी सुज्ञ नागरिक व महिलांनी केली आहे.)

पिंपळगाव हरेश्वर पोलीस स्टेशनला नव्याने रुजू झालेले सहाय्यक पोलीस निरीक्षक मा.श्री. कृष्णा भोये यांनी कायद्याचे सुदर्शन चक्र हाती घेत पिंपळगाव हरेश्वर पोलिस स्टेशनच्या हद्दीतील गावठी दारु हद्दपार करण्यासाठी कंबर कसली असून दारूचे मटके फोडण्यास सुरुवात केल्यामुळे पिंपळगाव हरेश्वर पोलीस स्टेशन हद्दीतील गावागावातून कृष्णा भोये यांचे अभिनंदन होत आहे.

पिंपळगाव हरेश्वर पोलीस स्टेशन हद्दीत मागील दीड वर्षापासून गावागावात मोठ्या प्रमाणात गावठी दारूची निर्मिती व विक्री सुरू होती. यामुळे गावागावात दारुड्यांची संख्या वाढत असल्याने गावात अशांतता पसरली होती. बरेचसे संसार उध्वस्त होत होते तर रोजची भांडणे, कौटुंबिक कलह, अल्पवयीन मुलांमध्ये व्यसनाधीनता वाढत चालली होती हा सगळा प्रकार लक्षात घेऊन गावातील सुज्ञ नागरिक व महिलांनी वारंवार अर्ज फाटे करून सुद्धा दारूबंदी होत नव्हती तसेच नुकत्याच बदलून गेलेल्या सौ.निताजी कायटे यांनी दारूबंदीसाठी प्रयत्न केले होते. परंतु काही ठिकाणी या अवैध दारू विक्री करणाऱ्यांना राजाश्रय मिळत असल्याने पोलिसांचा हेतू साध्य होत नव्हता.

मा.श्री. कृष्णा भोये साहेबांनी आठ दिवसापूर्वी पिंपळगाव हरेश्वर पोलीस स्टेशन चे सूत्र हाती घेऊन दोन दिवसापूर्वी कुऱ्हाड येथे ग्रामस्थांशी संपर्क साधून छोटेखानी मिटिंग घेतली व या ठिकाणी गावा गावातील गावठी दारू व देशी दारूची अवैध विक्री थांबवण्यासाठी मी प्रयत्नशील असेल असे सांगून ग्रामस्थांच्या सहकार्याची अपेक्षा व्यक्त केली आहे.

त्यानुसार आज मा.श्री. कृष्णा भोये साहेबांनी पोलिस हेड कॉन्स्टेबल मा.श्री. रणजित पाटील, मा.श्री. अरुण पाटील, मा.श्री. धिरज मंडलिक, मा.श्री. रविंद्रसिंग पाटील व योगिता चौधरी व त्यांच्या सहकाऱ्यांना सोबत घेत अवैध दारू निर्मिती व विक्रीच्या विरोधात धाडसत्र सुरु करुन दिनांक ०२ व ०३ सप्टेंबर रोजी शेवाळे शिवारातील सायराबाई रसूल तडवी ह्या त्यांच्या शेतात गावठी दारु गाळत असतांना धाड टाकून गावठी दारु निर्मीतीसाठी लागणारे हजारो रुपयाचे कच्चे रसायन व तयार गावठी दारु नष्ट केली.

तसेच शेवाळे शिवारातील पाझर तलावाजवळ शब्बीर रसूल तडवी हा गावठी दारु गाळण्यासाठी हातभट्टी चालवत असल्याची माहिती मिळाल्यावरुन या ठिकाणी धाड टाकून गावठी दारु निर्मीतीसाठी लागणारे हजारो रुपयाचे कच्चे रसायन व तयार गावठी दारु नष्ट केली.

तसेच दिनांक ०३ सप्टेंबर शुक्रवार रोजी धाड टाकून सुनिल मासूम तडवी गाव शिंदाड व महेमुदा बाई छोटू तडवी यांच्या गावठी दारु निर्मिती अड्ड्यावर धाड टाकून दारु तयार करण्यासाठी लागणारे पक्के रसायन व गावठी हातभट्टीची दारू तयार असा एकूण २४०००/०० रुपयांचा मुद्देमाल नष्ट केला आहे.

या कारवाईमुळे सुज्ञ नागरिक व महिलावर्गातून समाधान व्यक्त केले जात असून मा.श्री. कृष्णा भोये यांनी अवैधधंद्याचे विरोधात कडक मोहीम राबवून गावागावातील अवैधधंदे बंद करुन माता, भगिनींचे उध्वस्त होणारे संसार वाचवावेत अशी आपेक्षा व्यक्त केली आहे.