दिलीप जैन.(पाचोरा)
दिनांक~२९/०१/२०२२

महाराष्ट्रातच नव्हे तर मध्यप्रदेश, गुजरात राज्यात प्रसिद्ध असलेले पाचोरा तालुक्यातील देवस्थान म्हणजे सावखेडा येथील भैरवनाथ बाबांचे मंदिर आहे. या ठिकाणी सालाबादप्रमाणे दरवर्षी पौष महिन्याच्या प्रत्येक रविवारी यात्रा भरते. परंतु मागील वर्षांपासून कोरोनाचे संकट ओढवल्यामुळे यात्रा उत्सव बंद आहे. म्हणून या मंदिर परिसरात बऱ्यापैकी शुकशुकाट असतो. नेमके याच संधीचा फायदा घेत दिनांक १७ जानेवारी सोमवार रोजी भैरवनाथ बाबांच्या मंदीरातुन अज्ञात चोरट्याने रात्री कुलुप तोडुन दानपेटील पैसे व मंदिरात लावलेल्या देवाच्या दोन कीलो चांदीच्या छत्र्या व चैना इत्यादी ऐवज चोरुन नेले होते. या चोरी प्रकरणी पिंपळगाव हरेश्वर पोलीस स्टेशनला गुन्हा रजिस्टर नंबर १३/२०२२ भा.द.वी. ३८० अन्वये गुन्हा दाखल करण्यात आला होता.

हा गुन्हा दाखल झाल्यानंतर चौकशी सुरु करतांना प्रथम भैरवनाथ बाबांच्या मंदीरात बसवण्यात आलेल्या सी.सी.टि.व्ही. फुटेज वरुन पुढील तपास करण्यासाठी व दिनांक २८ जानेवारी शुक्रवार रोजी गोपनिय माहीती मिळाल्याने मा. पोलिस अधिक्षक सो. जळगाव श्री. प्रविण मुंडे, मा. अपर पोलीस अधिक्षक सो. चाळीसगाव परीमंडळ श्री. रमेश चोपडे व मा. उपविभागीय पोलीस अधिकारी सो. पाचोरा भाग पाचोरा श्री. भारत काकडे यांच्या सुचने नुसार सहाय्यक पोलीस निरीक्षक श्री. कृष्णा भोये यांच्या मार्गदर्शना खाली पोलिस हेड कॉन्स्टेबल श्री. रणजीत पाटील, पोलिस नाईक श्री. अरुण राजपुत पोलिस कॉन्स्टेबल श्री. संदीप राजपुत व सचिन वाघ असे पथक तयार करुन तपास कामी रवाना केले होते.

या तपासकामी पिंपळगाव हरेश्वर पोलिस स्टेशनच्या सिमे जवळील सोयगाव ते कंकराळा रोडवर मेनगाव फाट्या जवळुन गुन्ह्यातील आरोपी भानुदास गंगाधर सोनवणे वय ३० राहाणार कंकराळा तालुका सोयगाव जिल्हा औरंगाबाद यास ताब्यात घेऊन विचारपूस केली असता सदर आरोपी गंगाधर सोनवणे याने गुन्ह्याची कबूली दिली म्हणून अधिक तपासात मंदिरातील चोरीस गेलेला मुद्देमाल चांदीच्या साखळ्या व छत्र्या पोलिसांनी हस्तगत केल्या असून पुढील तपास सहाय्यक पोलीस निरीक्षक मा.श्री. कृष्णा भोये यांच्या मार्गदर्शणाखाली सहाय्यक फौजदार विजय माळी करीत आहे.