दिलीप जैन.(पाचोरा)
दिनांक~०६/१२/२०२१

(दारुबंदी करण्यासाठी सतत झटत असणाऱ्या आदरणीय गीतांजली ताई ह्या येत्या ०९ डिसेंबर गुरुवारी कुऱ्हाड गावी भेट देणार असून पिंपळगाव हरेश्वर पोलिस व जिल्हा पोलिस अधीक्षक यांची भेट घेणार आहेत.)

पाचोरा तालुक्यातच नव्हे तर चाळीसगाव, सोयगाव व जळगाव जिल्ह्यात अवैधधंद्याचे माहेर घर म्हणून प्रसिध्दीस येत असलेल्या कुऱ्हाड गावात आज एका नवीन जुगाराच्या अड्ड्याचा शुभारंभ मोठ्या थाटात होणार असून हा अड्डा चालवण्यासाठी संबधित चालकाला कायद्याच्या रक्षकांपैकी एकाने हम करे सो कायदा असा स्वताचा गैरसमज करुन अनाधिकृतरीत्या परवानगी दिली असल्याचे जनमानसातून चर्चिले जात आहे.

याबाबत सविस्तर वृत्त असेकी पाचोरा तालुक्यातील कुऱ्हाड हे गाव सट्टा, पत्ता, गावठी दारू, देशी दारू विक्री या अवैध धंद्यांचे माहेरघर बनले आहे. याबाबत गावातील सुज्ञ नागरिकांनी व महिला वर्गाने वारंवार तक्रारी करून सुद्धा हे अवैध धंदे थांबण्याचे नाव घेत नसून उलट दिवसेंदिवस अवैध धंदे करणाऱ्यांची संख्या वाढत आहे.

या अवैधंद्यामुळे आजपर्यंत बरेचसे वादविवाद झाले असून आत्महत्या सारखे प्रकार घडले आहेत. तसेच या ठिकाणी आसपासच्या आठ ते दहा गावातील जुगारी, सट्टा, पत्ता खेळणारे येत असल्याने कुऱ्हाड गावात जणू बाजारच भरतो तरीही हे अवैधधंदे बंद होत नाहीत कारण या अवैधधंदे करणारांना राजकीय पाठबळ मिळत असावे अशी शंका उपस्थित केली जात असून हे अवैधधंदे बंद होण्यापेक्षा दिवसेंदिवस वाढत असल्याने कुऱ्हाड गावासह पंचक्रोशीतील गावात चिंता व्यक्त केली जात आहे.

कुऱ्हाड गावातील गावठी दारू निर्मिती व विक्री दिवसाढवळ्या अहोरात्र २४ तास सुरू असून येथील गावठी दारू निर्मिती व विक्री आसपासच्या दहा खेड्यांची डोकेदुखी ठरत आहे. तसेच गावात ठिकठिकाणी खुलेआमपणे सट्टा बेटिंगची दुकाने दिसून येतात. या गावात अगोदर एक जुगाराचा अड्ड्या दिवसाढवळ्या रात्रंदिवस सुरु असून दुसरा चोरी,चोरी, चुपके, चुपके सुरु आहे.

आज रोजी कुऱ्हाड गावात नवीन जुगाराचा अड्डा सुरु होणार असल्याचे खात्रीलायक वृत्त असून या अड्ड्याचा शुभारंभ मोठ्या थाटात होणार असल्याचे बोलले जाते. यामागील कारण म्हणजे संबंधित जुगाराचा अड्ड्या सुरु करण्यासाठी मला परवानगी मिळाली असून दरमहा १५०००/०० हप्ता ठरला असल्याचे संबंधित व्यक्ती मोठ्या रुबाबदार शैलीत सांगत असल्याचे जनतेतून चर्चिले जात आहे.

हे गाव अवैधधंद्याचे माहेर घर बनलेले असून याबाबत कुणीही आवाज उठवल्यावर त्या व्यक्तीला हे अवैधधंदे करणारे दमदाटी करत असल्याने मांजराच्या गळ्यात घंटा बांधायला कुणीही तयार होत नसल्याने अवैधधंदे करणारांची संख्या दिवसेंदिवस वाढतच असून या अवैधंद्यामुळे लहान, थोर,तरुण मंडळी व्यसनाच्या आहारी जात असल्याने अनेक कुटुंब बर्बाद झाली असून बरीचशी कुटुंब बर्बादीच्या मार्गावर आहेत.

या अवैधधंद्याचे विरोधात वारंवार आवाज उठवल्यावरही कोणतीही ठोस कारवाई होऊन हे अवैधधंदे कायमस्वरूपी बंद होत नसल्याने सुज्ञ नागरिक व सर्वसामान्य जनता विशेष करुन महिलावर्ग हताश होऊन आपल्या नशीबाला दोष देत हे नशीबातील भोग समजून हतबल होऊन जीवन जगात असल्याचे दिसून येते.

(त्यांना आम्ही पाहून घेऊ = कुऱ्हाड खुर्द गावातील अवैधधंद्याचे विरोधात आवाज उठवणाऱ्यांना वेगळाच अनुभव येत असून अधूनमधून प्रत्यक्ष, अप्रत्यक्षपणे दमदाटी होत असल्याचे समजते तसेच अश्या कितीही बातम्या छापून आल्यातरी आमचे काहीही वाकडे होणार नाही. वेळ आल्यावर पत्रकार व वार्ताहरांनाही पाहून घेऊ अशी भाषा वापरली जात असल्याने लवकरच काही नागरिक नाशिक येथे जाऊन आय.जी.साहेबांची भेट घेऊन कैफियत मांडणार असल्याचे बाजूला बोलले जात आहे. )