कर्मचाऱ्याला पगार न मिळाल्याने, अंबे वडगावची पाणी पुरवठा योजना ठप्प. माहेरी आलेल्या लेकीच्या डोक्यावर पाण्याचा हंडा.
प्रासंगिक फोटो.
दिलीप जैन.(पाचोरा)
दिनांक~१४/११/२०२१
पाचोरा तालुक्यातील आंबे वडगाव येथील ग्रामपंचायतीने मागील जवळपास एक वर्षापासून पाणीपुरवठा करणाऱ्या कर्मचाऱ्याचा पगार न दिल्यामुळे ऐन दिवाळीया सणासुदीच्या दिवसात संबंधित कर्मचाऱ्यांनी काम बंद केल्यामुळे आंबे वडगाव गावात पाणी टंचाई भासत आहे.
विशेष म्हणजे दिवाळी निमित्त माहेरी आलेल्या लेकीला आरामात दोन घास खायला भेटतील या अपेक्षेने माहेरी आलेल्या लेकीला अचानक पाणी पुरवठा बंद झाल्यामुळे डोक्यावर हंडे घेऊन पाणी भरण्याची वेळ आली आहे.
ग्रामपंचायतीकडून होणारा पाणी पुरवठा अचानक बंद झाल्यामुळे ग्रामस्थांना गरजेपोटी गावठाण तसेच आसपासच्या विहिरींचे पाणी वापरावे लागत असल्याने विहिरींचे पाणी शुद्ध नसल्याने अनेकांना सर्दी, खोकला व इतर व्याधींचा त्रास जाणवत आहे. म्हणून ग्रामपंचायतीने त्वरीत पाणी पुरवठा सुरु करावा अशी मागणी ग्रामस्थ व महिला वर्गाकडून होत आहे.
तर दुसरीकडे ग्रामस्थ हे ग्रामपंचायतीचे कर वेळेवर भरत नसून बऱ्यापैकी ग्रामस्थांनी जवळपास तीन ते चार वर्षांपासून पाणी पट्टी, घरपट्टी हे कर न भरल्यामुळे ग्रामपंचायत आर्थिकदृष्ट्या सक्षम नसल्याने ग्रामपंचायत कर्मच्याऱ्याचे पगार देणे शक्य होत नसल्याची चर्चा ऐकायला मिळत आहे.
म्हणून ग्रामस्थांनी ग्रामपंचायत कर भरुन सहकार्य केल्यास ही समस्या लवकरात लवकर सुटू शकते तसेच कर्मचाऱ्यांना लवकरच पगार देण्यासाठी आम्ही प्रयत्नशील असल्याचे सरपंच यांनी सांगितले आहे.