दिलीप जैन.(पाचोरा)
दिनांक~०३/१०/२०२१

यावर्षी शेतकऱ्यांना अनेक अडणींचा सामना करावा लागत आहे. मागील महिन्यात गुराढोरांना लाळी, खुरकट या आजाराची लागण झाली होती. त्यातच हिरव्या चाऱ्यामुळे काही जनावरांना पोटफुगी इतर आजाराचा सामना करावा लागला या आजारावर उपचार करुन घेण्यासाठी पशुधन पालकांना आर्थिक झळ बसली. त्यातच या आठवड्यात अतिवृष्टी झाल्यामुळे हाती आलेली पीके नष्ट झाली. व याच संकटातून सावरत नाही तोच लम्पी स्कीन या आजाराने डोके वर काढले आहे. व त्याबाबत सजग रहाण्याच्या सुचना जिल्हाधिकारी मा.श्री.अभिजित राऊत साहेबांनी दिल्या आहेत.

यात जळगाव, चाळीसगाव तालुक्यातील मौजे वाकडी, पाचोरा तालुक्यातील नांद्रा, पिंपरखेड, वरखेड, भडगाव तालुक्यातील पिर्चेडे या ठिकाणी जनावरांमध्ये लम्पी या त्वचेच्या साथ रोगाचा निष्कर्ष होकारार्थी आला आहे. या रोगाचा प्रसार जिल्ह्यात होण्याची शक्यता नाकारता येत नाही. त्यामुळे चाळीसगाव, पाचोरा, भडगाव तालुक्यातील या चार संसर्गकेंद्रापासून १० कि.मी बाधित क्षेत्र म्हणून घोषित केल्याचे आदेश जिल्हाधिकारी अभिजीत राऊत यांनी निर्गमित केले आहे.

लम्पी या त्वचेच्या आजाराच्या संसर्गाच्या अनुषंगाने बाधित क्षेत्रातील जनावरांचे शेड निर्जतुकीकरण करुन १० कि.मी परिघातील परिसरात जनावरांची खरेदी-विक्री, वाहतुक, बाजार व जत्रा प्रदर्शन आयोजित करण्यासही प्रतिबंध घालण्यात आले आहे.

प्रादुर्भाव असलेल्या भागातील जनावरांचा बाजार, यात्रा, पशु प्रदर्शन इ. वर बंदी आणण्याच्या दृष्टीने या ठिकाणाच्या १० कि. मी परिघातील जनावरांना गोट पॉक्स लसीकरण तात्काळ करण्याचे निर्देश जिल्हा पशुसंवर्धन उपआयुक्त, सहाय्यक आयुक्त पशुसंर्वधन, जिल्हा पशुवैद्यकिय सर्वचिकित्सालय व जिल्हा पशुसंवर्धन अधिकारी यांना दिले असून त्यांनी या परिसरातील सर्व जनावरांचे १०० टक्के लसीकरण करण्याच्या सूचनाही जिल्हाधिकारी अभिजीत राऊत यांनी दिल्या आहेत.

या भागातील जनावरांचे लसीकरण करण्यासाठी सद्यस्थितीत १५ हजार लस सेवाशुल्कातून खरेदी करण्यात आली असून चाळीसगांव, पाचोरा व भडगाव तालुक्यात लसीकरण सुरू करण्यात आले आहे. जिल्ह्यातील इतर भागातील जनावरांमध्ये या साथरोगाचा प्रादुर्भाव वाढू नये याकरीता अजून १० हजार लस पशुसंवर्धन विभागाकडून सोमवारी प्राप्त होणार असून जिल्ह्यातील पशुधनांची संख्या लक्षात घेता विभागाकडे अतिरिक्त ५० हजार लसीची मागणी करण्यात आली आहे जिल्ह्यातील सर्व तालुक्यात बाधीत जनावरांची संख्या, त्यांना लागणारी लसीची मात्रा याबाबत तातडीने तपासणी करुन वस्तुनिष्ठ अहवाल सोमवारपर्यत सादर करण्याचे निर्देश जिल्हाधिकारी राऊत यांनी संबंधित यंत्रणेला दिले जिल्ह्यात आवश्यकतेनुसार लसीची मात्रा उपलब्ध करुन देता येईल. तसेच सेवाशुल्कातून जिल्हास्तरावर लस खरेदी करण्यात येणार आहे.

जिल्ह्यातील जनावरांमध्ये आढळून आलेल्या लम्पी या साथरोग आजाराच्या पार्श्वभूमीवर जिल्ह्यातील जनावरांना तातडीने लसीची मात्रा देण्यासाठी जिल्ह्यातील प्रत्येक ग्रामपंचायतीकडून १० हजार रुपये ग्रामनिधीतून उपलब्ध करुन देण्याचे निर्देश मुख्य कार्यकारी अधिकारी डॉ.पंकज आशिया यांनी यंत्रणेला दिले आहेत.

सर्व तालुक्यात गट विकास अधिकाऱ्यांच्या स्तरावर ग्रामसेवक व पशुसंवर्धन संस्थाप्रमुखांची बैठक घेवून हा निधी तात्काळ उपलब्ध करण्याच्या सुचना देण्यात आलेल्या आहेत. यातून लस खरेदी व औषध खरेदी करण्यात येइल. ग्रामपातळीवर लसीकरण व गोठा स्वच्छता, गोचीड निर्मूलन मोहिम स्वरुपात राबविण्याचे नियोजन करण्यात आल्याचेही डॉ.आशिया यांनी कळविले आहे. पशुधन मालकांनी आपल्या जनावरांवर बारकाईन लक्ष ठेवावे जनावरांमध्ये लम्पी स्किन डिसीज सदृष्य लक्षणे आढळून आल्यास पशुसंवर्धन विभागाकडून त्वरीत तपासणी करुन घेण्याचे आवाहन जिल्हाधिकारी राऊत यांनी केले आहे.