दिलीप जैन.(पाचोरा)
दिनांक~१०/०९/२०२१

पाचोरा व भडगाव तालुक्यात अतिष्टीमुळे झालेल्या नुकसानीची भरपाई शेतकरी बांधवांना कोकण धर्तीवर मिळावी या मागणीसाठी आमदार मा.श्री. किशोर आप्पा पाटील यांनी बुधवारी मुख्यमंत्री मा.श्री.उद्धव ठाकरे यांची नुकतीच भेट घेऊन मदतीसाठी साकडे घातले.

पाचोरा, भडगाव मतदारसंघात पावसामुळे झालेल्या नुकसानीची माहिती देत तसेच आधीच कोरोनामुळे हवालदिल झालेल्या जनतेला यातून दिलासा देण्यासाठी शासनामार्फत भरघोस मदत देऊन नुकसान भरपाई द्यावी अशी विनंती मुख्यमंत्री मा.श्री.उद्धव ठाकरे यांना केली. यावर मुख्यमंत्र्यांनी त्यांचे म्हणणे सविस्तरपणे एकूण घेत सर्वोतोपरी मदतीचे आश्वासन दिले.

नुकत्याच पाचोरा व भडगाव तालुक्यात झालेल्या मुसळधार पावसामुळे तसेच औरंगाबाद जिल्ह्यातील सोयगाव तालुक्यातील भिलदरी येथील प्रकल्प फुटल्याने तितुर आणि गढद नदीला महापुर येवुन पाचोरा तालुक्यातील ११ तर भडगाव तालुक्यातील ४ गावांमध्ये पुराचे पाणी शिरल्याने नागरिकांचे मोठे नुकसान झाले आहे. दोन्ही तालुक्यात सुमारे ६० घरांची पडझड झाली असून अनेक घरांचे लहानमोठे नुकसान झोले आहे. तसेच सुमारे २५० हेक्टर क्षेत्रावरील पिके वाया गेल्याने शेतकऱ्यांच्या हातातोंडाशी आलेला घास हिरावला गेला आहे.

पाचोरा तालुक्यातील सावखेडा खुर्द गावाचा संपर्क तुटला होता. तसेच नगरदेवळा, कजगाव येथील पुलही वाहुन गेल्याने अनेक गावांचा संपर्क तुटला आहे. याशिवाय अनेक गावात इलेक्ट्रीक तारा तुटुन व विजेचे खांब पडल्याने काही गावांचा विज पुरवठा खंडित झाल्याने शेतकरी हवालदिल झाले आहेत. त्यांच्या झालेल्या नुकसानीचे तात्काळ पंचनामे करण्याचे आदेश आमदार मा.श्री. किशोर आप्पा पाटील यांनी प्रशासनाला दिले होते. त्यानुसार प्रांताधिकारी डॉ. विक्रम बांदल यांनी संबंधित गावाचे तलाठी, ग्रामसेवक व कृषी सहाय्यकांमार्फत पंचनामे पूर्ण करून शासनास अहवाल सादर केला आहे.

आपल्याला लवकरात लवकर नुकसानभरपाई मिळेल अशी आशा नुकसानग्रस्त शेतकऱ्यांना लागली आहे.