दिलीप जैन.(पाचोरा)
दिनांक~१३/०३/२०२१

पाचोरा तालुक्यातील वरखेडी येथील प्राथमिक आरोग्य केंद्रात दिनांक ०८ मार्च सोमवारपासून मोफत कोव्हीड लसीकरणास सुरवात करण्यात आली असून या ठिकाणी सोमवार, बुधवार व शुक्रवार यादिवशी कोव्हीड लसीकरण करण्यात येणार आहे. अशी माहिती वरखेडी प्राथमिक आरोग्य केंदाचे वैद्यकीय अधिकारी डॉक्टर शेखर पाटील यांनी दिली.

डॉक्टर शेखर पाटील. सविस्तर माहिती देतांना

या ठिकाणी कोव्हीड लसीकरणास सुरवात झाल्यावर काही दिवस लस घेण्यासाठी येणारांची संख्या कमी होती परंतु ग्रामपंचायत, आरोग्य कर्मचारी, आशा स्वयंसेवीका, अंगणवाडी सेवीका यांच्या मार्फत गावागावात महिती देऊन लसीकरण करुन घ्यावे असे आवाहन केल्यानंतर लसीकरणास चांगला प्रतिसाद मिळत असून ठरलेल्या नियमानुसार दररोज शंभर लाभार्थ्यांना या लसीकरणाचा लाभ मिळत आहे. परंतु बऱ्याच लोकांचे आधारकार्ड मोबाईल नंबरला लिंक नसल्याने व्यत्यय येत असला तरी दवाखान्यात आल्यानंतर फोटो काढून तशी व्यवस्था करावी लागत असल्याने लसीकरणास येण्याअगोदर प्रत्येकाने आपला मोबाईल क्रमांक आधारकार्ड ला सलग्न करुन घ्यावा असे सुचवण्यात आले आहे.

वरखेडी प्राथमिक आरोग्य केंद्राचे कक्षेत ३३ गावांचा समावेश असून एकुण लोकसंख्या ६१००० जवळपास असून ६००० सहा हजाराचे जवळपास ४५ ते ६० वयातील लोकांना लसीकरण करण्यासाठी प्रयत्न सुरु आहेत. परंतु भविष्यात लसीकरण करुन घेण्यासाठी येणारांची गर्दी वाढणार असून दररोज फक्त शंभर लोकांना लसीकरण करण्यासाठीचे उदिष्ट असल्याने आठवड्यातून फक्त तीन दिवस म्हणजे महिन्याला बारा दिवस लसीकरण केल्यास दरमहा फक्त १२०० लोकांना लसीकरणाचा लाभ मिळणार असल्याने ६००० लोकांना लसीकरण करण्यासाठी पाच महिने लागतील म्हणून लसीकरणाचा लाभ लवकरात लवकर मिळावा म्हणून दररोज करण्यात येणाऱ्या लसीकरणाचा लाभ जास्तीतजास्त कसा देता येईल व लसीकरणाचे उदिष्ट लवकर पूर्ण करण्यासाठी प्रयत्न होणे गरजेचे आहे.