पाचोरा, भडगाव कृषी उत्पन्न बाजार समिती निवडणूक भाजपा स्वबळावरच लढणार, भाजपा पदाधिकारी व कार्यकर्त्यांचा निर्धार.
दिलीप जैन.(पाचोरा)
दिनांक~१२/०४/२०२३
दिनांक २८ एप्रिल २०२३ शुक्रवार रोजी होणाऱ्या पाचोरा, भडगाव कृषी उत्पन्न बाजार समितीची निवडणुक भारतीय जनता पार्टीच्या वतीने संपूर्णपणे स्वबळावर लढवली जाणार असुन भाजपाच्या वतीने या निवडणुकीसाठी बहुसंख्य उमेदवारांनी नामनिर्देशन दाखल केले आहेत. तसेच या निवडणुकीत भारतीय जनता पार्टी सोबत काही समविचारी उमेदवार निवडणूक लढणार आहेत. ही निवडणूक भाजपा तालुकाध्यक्ष अमोलभाऊ शिंदे यांच्या मार्गदर्शनाखाली व कृषी उत्पन्न बाजार समितीचे माजी सभापती सतीषबापु शिंदे यांच्या नेतृत्वाखाली लढवली जाणार असून या निवडणुकीच्या निमित्ताने उमेदवारी अर्ज दाखल केलेल्या उमेदवारांनी व भारतीय जनता पार्टीच्या कार्यकर्त्यांनी मतदारांशी आपला स्वतंत्र संपर्क सुरू केलेला आहे.
आपण ही निवडणूक स्वबळावर लढणार आहोत. तरी आमदारांनी केलेल्या कुठल्याही प्रकारच्या अफवांना मतदारांनी व कार्यकर्त्यांनी बळी पडु नये. तसेच भाजपा पाचोरा व भडगांव तालुक्यातील पदाधिकारी व कार्यकर्ते एकसंघ असुन या निवडणुकीसाठी ताकदीने कामाला लागले आहेत. असे तालुकाध्यक्ष अमोलभाऊ शिंदे यांनी प्रसिध्दीस दिलेल्या पत्रकात म्हटले आहे. विशेष म्हणजे आमदारांच्या पायाखालची वाळू सरकल्यामुळे आमदार दुसऱ्या पक्षांचे प्रवक्तेपद बळजबरीने उसने भाड्याने घेतल्यासारखे पत्रकार परिषदा घेत फिरत आहेत.हश त्यांची स्वबळावर निवडणुका लढवण्याची ताकत व कुवत पूर्णपणे खचली असल्याणे आमदारांना व त्याच्या उर्वरित उमेदवारांना कुठलाही आत्मविश्वास उरलेला दिसत नसल्याचे समोर दिसून येत आहे.
ज्या आमदारांना पूर्वी भाजपा नकोशी होती. भाजपाच्या नावाने आतापर्यंत ते आकांड तांडव करत होते. त्याच भाजपा कार्यकर्त्यांना आता चुकीच्या पद्धतीने त्रास देत होते व त्यांनाच आज अचानक भाजपाची गरज का पडतेय ? त्यांना भाजपाची आठवण येण्याची उपरती का झाली ? असे प्रश्न यावेळी भाजपाचे भडगाव तालुकाध्यक्ष अमोल पाटील यांनी प्रसिध्दी पत्रकात उपस्थित केले आहेत.
तसेच २० एप्रिल २०२३ गुरुवार रोजी माघारी नंतर भाजपा व समविचारी उमेदवारांच्या प्रचारांत भारतीय जनता पार्टीचे पाचोरा व भडगाव तालुक्यातील सर्व कार्यकर्ते पूर्णपणे स्वतःला झोकून देऊन काम करतील असे शहराध्यक्ष रमेश वाणी यांनी प्रसिध्दी पत्रकात म्हटले आहे. तसेच आमदारांनी मेळाव्यात व पत्रकार परिषदेत केलेल्या आरोपांना योग्य त्या ठिकाणी पुराव्या निशी उत्तर देऊन त्यांचा खरा चेहरा मतदारांसमोर उघडा करू. असे तालुकाध्यक्ष अमोल शिंदे यांनी सदर प्रसिध्दी पत्रकात म्हटले आहे.
अमोल पंडीतराव शिंदे (भाजपा तालुकाध्यक्ष पाचोरा), अमोल नाना पाटील. (भाजपा तालुकाध्यक्ष,भडगांव), रमेश मुरलीधर वाणी. (शहराध्यक्ष पाचोरा) यांनी या निवडणुकीसाठी कंबर कसली असून ही लढाई पुर्ण ताकदीने लढून विजय प्राप्त करु अशी ग्वाही दिली आहे.