दिलीप जैन.(पाचोरा)
दिनांक~२८/०५/२०२२

पाचोरा तालुक्यातील वडगाव आंबे विविध कार्यकारी सहकारी सोसायटीची २०२२ ते २०२७ या कालावधीसाठी संचालक मंडळाची पंचवार्षिक जाहीर झाली असून वडगाव आंबे विविध कार्यकारी सहकारी सोसायटीत वडगाव आंबे, वडगाव आंबे खुर्द, वडगाव आंबे बुद्रुक, कोठडी तांडा व वडगाव जोगे या गावांचा समावेश असून या सोसायटीत ३१ मार्च २०१९ च्या अहवालानुसार १२६२ एकुण सभासद असून पैकी ३१५ सभासद मयत झाले आहेत तसेच २०५ सभासद थकबाकीदार असल्याने फक्त ७४२ सभासद पात्र असल्याने यांनाच मतदानाचा हक्क बजावता येणार आहे.

या संचालक मंडळाच्या निवडीसाठी दिनांक ०५ जून २०२२ रविवार रोजी मतदान घेण्यात येणार असून दोघेही पॅनलमध्ये प्रचारासाठी जोरदार तयारी सुरू आहे. या विविध कार्यकारी सहकारी सोसायटीच्या पंचवार्षिक निवडणुकीत लोकसहकार पॅनल हे पतंग व नम्रता पॅनल हे कपबशी निशाणी घेऊन मैदानात उतरले आहे.

या निवडणुकीत लोकसहकार पॅनलचे १२ उमेदवार निश्चित झाले असून यात सर्व साधारण मतदारसंघातून जाधव रणजीत मदन, मराठे भास्कर आनंद, पाटील नाना राजाराम, राठोड चरणसिंग महारु, राठोड देविदास दुधा, राठोड सचिन सरदार, शिंदे अमोल रायबा, वंजारी आत्माराम भावडू महिला राखीव मतदारसंघातून मराठे विमलबाई कौतिक, इतर आगास वर्ग (ओ.बी.सी) मतदारसंघातून गायकवाड मंगेश वसंत, विमुक्त जाती, भटक्या जमाती व विशेष मागास प्रवर्ग मतदारसंघातून पवार अरुण बाबुराव, अनुसूचित जाती जमाती मतदारसंघातून कांबळे ज्योतीराम सिताराम हे उमेदवारी लढवत असून यांच्या विरोधात नम्रता पॅनलचे १३ उमेदवार निश्चित झाले आहेत.

या निवडणुकीच्या प्रचारासाठी आज दिनांक ३१ मे २०२२ मंगळवार रोजी लोकसहकार पॅनलने वडगाव आंबे येथील आराध्य दैवत जागृत देवस्थान श्री. अंबिका मातेच्या मंदिरात देवीची पूजा करुन श्रीफळ वाढवून तसेच पारिमांडल्य महानुभाव आश्रमातील मोठे बाबांचे दर्शन व दंडवत घेत आशिर्वाद घेऊन श्रीफळ वाढवून प्रचारासाठी सुरुवात करण्यात आली आहे.

याप्रसंगी मा.श्री. नाना वाघ, तंटामुक्ती अध्यक्ष मा.श्री. पितांबर सपकाळे (कोळी), ग्रामपंचायत सदस्य मा.श्री. मुकेश पाटील, कायदेतज्ज्ञ मा.श्री. मंगेशराव गायकवाड यांनी आपले मनोगत व्यक्त करतांना विविध कार्यकारी सहकारी सोसायटीची निवडणूक फक्त पाच वर्षांसाठी असून आपण एकाच गावातील रहिवासी असल्याने आपले नाते, संबंध, मैत्री ही वर्षानुवर्षांपासून आहे म्हणून या निवडणुकीत प्रचार करतांना कुणीही कुणाबद्दल व्देश भावना वाढतील, आपसातील मते दुषित होऊन गावात अशांतता निर्माण होईल, मैत्री, नातेसंबंध दुरावतील अशी खेळी न खेळता खेळीमेळीच्या वातावरणात ही निवडणूक पार पाडावी असे आवाहन करत योग्य ते मार्गदर्शन व सल्ला दिला.

तसेच बऱ्याचशा निवडणुकीमध्ये पैसा, दारु, पार्ट्या व इतर वाममार्गाला जाऊन मतदान पदरात पाडून घेण्यासाठी प्रयत्न केले जातात हा प्रकार आपल्या गावात होऊ नये असे आवाहन करत मतदान मिळवण्यासाठी आपण निवडून आल्यानंतर सोसायटीच्या व सभासदांच्या भल्यासाठी काय करणार आहोत हे पटवून देत मतदान मागावे परंतु दोन दिवसांच्या प्रचारासाठी व सत्तेसाठी गावातील एकोपा व शांतता भंग होईल असे कृत्य कोणत्याही पॅनलकडून अपेक्षित नाही असे सांगितले.

लोकसहकार पॅनलच्या प्राचाराच्या शुभारंभ प्रसंगी लोकसहकार पॅनलचे उमेदवार तसेच वडगाव आंबे, वडगाव, आंबे तांडा नंबर एक, वडगाव आंबे तांडा नंबर दोन, कोकडी तांडा, वडगाव जोगे या पाचही गावातांड्यातुन विविध कार्यकारी सहकारी सोसायटीचे बहुसंख्य सभासद, हितचिंतक व स्नेही मित्र मंडळी हजर होते.