दिलीप जैन.(पाचोरा)
दिनांक~२७/०२/२०२२

अंबे वडगाव येथील सुभाष शंकर काळे यांचे आज वयाच्या (७५) व्या वर्षी अल्पशा आजाराने दुखद निधन झाले. त्यांच्या मागे पत्नी, भाऊ, दोन मुले, एक मुलगी, सुना, पुतणे, वहिनी, नातवंडे असा परिवार आहे.

सुभाष काळे यांचा वडिलोपार्जित सुतार व्यवसाय लहानपणापासून वडीलांच्या सोबत राहून सुतार व्यवसायाचे शिक्षण घेत चांगल्याप्रकारे शेती अवजारे तसेच बैलगाडी बनवण्यात त्याचा हातखंडा होता. तसेच लाकड्याच्या बाहुल्या, विठ्ठलाची लाकडी मुर्ती, अनेक आकर्षक वस्तू, आकर्षक खेळणी तसेच दरवाजा असो किवा कुठेही लाकडी काम करतांना कोणत्याही यंत्राचा वापर न करता फक्त वासला, किकरे व इतर साहित्य वापरुन हस्तकलेच्या जोरावर कोरीव काम करुन लाकडालाही बोलके करण्याची कला यांच्याकडे होती.

तसेच सामाजिक कार्यात त्याचा सहभाग होता. यातुनच त्यांना पेटी (हार्मोनियम), पखवाज वाजण्याच्या सोबतच आपल्या मधूर आवाजातून ते गावात कुठेही पाचवीला, बारशाला तसेच भजन, किर्तनाचे वेळी भजन, भारुड म्हणत असत. एव्हढेच नव्हे तर त्यांना नाटकाची गोडी होती. त्यांनी अंबिका नाट्य मंडळाच्या माध्यमातून डाकू मानसिंग, एकच प्याला, अश्या विविध नाटकातून स्री पात्राची भुमिका करत प्रेक्षकांना मोहून घेत असत. स्री पात्राची भुमिका साकारतांना त्या भुमिकेत एकरुप होऊन ते भुमिका करत असल्याने नाटक संपल्यावर मुळ वेशभूषेत पाहिल्यावर नवीन प्रेक्षक त्यांना पाहिल्यावर अचंबित होत असत असे हे अष्टपैलू, मनमिळाऊ स्वभावाचे व्यक्तीमत्व आज अनंतात विलीन झाल्यामुळे अंबे वडगाव गावासह पंचक्रोशीत हळहळ व्यक्त केली जात आहे.

अंत्यविधी~

यांची अंतिम यात्रा उद्या सकाळी ०९ वाजता राहत्या घरापासून निघणार आहे.