दिलीप जैन.(पाचोरा)
दिनांक~१३/०४/२०२४

भारतीय जनता पक्षाने पंतप्रधान मा. श्री. नरेंद्रजी मोदी यांच्या नेतृत्वाखाली ४० स्टार प्रचारकांची यादी निवडणूक आयोगाला दिली होती. भारतीय जनता पक्षाने दिलेल्या या स्टार प्रचारकांच्या यादीतून मुख्यमंत्री एकनाथराव शिंदे व उपमुख्यमंत्री अजित दादा पवार यांची नावे हटविण्यात आली असल्याची माहिती समोर येत आहे. यामागील कारण म्हणजे शरद पवार गटाने आक्षेप घेतल्यानंतर निवडणूक आयोगाने एखादा राजकीय पक्ष इतर पक्षांच्या नेत्यांची नावे आपल्या स्टार प्रचारकांच्य यादीत घेऊ शकत नसल्याचे नमूद करत भाजपला ०५ एप्रिल २०२४ शुक्रवार रोजी पत्र पाठवून उत्तर मागितले होते. तसेच इतर राजकीय पक्षांच्या नेत्यांची नावे आपल्या पक्षाच्या यादीत घेऊ नये अन्यथा ते कायद्याचे उल्लंघन होईल अशी समज दिली होती त्यानंतर भाजपने लगेचच हा मोठा निर्णय घेतला आहे.

याबाबत सविस्तर वृत्त असे की दोन्ही राजकीय पक्षांनी स्टार प्रचारकांच्या यादीत इतर पक्षांच्या नेतांचा समावेश केला आहे. तसेच २६ मार्च २०२४ रोजी भाजपाने ४० स्टार प्रचारकांची यादी दिली होती त्यात मुख्यमंत्री एकनाथराव शिंदे, उपमुख्यमंत्री अजित पवार आणि केंद्रीय सामाजिक न्याय राज्यमंत्री रामदास आठवले यांच्या नावाचा समावेश असल्याचा तसेच शिंदे गटाने त्यांच्या यादीत पंतप्रधान मा. श्री. नरेंद्रजी मोदी, केंद्रीय गृहमंत्री मा. श्री. अमित शहा आणि देवेंद्र फडणवीस यांच्या नावाचा समावेश केला असल्याचे शरद पवार गटाने म्हटले होते. त्यानंतर नावे वगळण्यात आली असल्याचे खात्रीलायक वृत्त आहे.