कुऱ्हाड बुद्रुक येथील ९५ वर्षाच्या आजीबाईंनी केली कोरोनावर मात.
दिलीप जैन.(पाचोरा)
दिनांक~०१/०५/२०२१
पाचोरा तालुक्यातील कुऱ्हाड बुद्रुक येथील प्रगतीशील शेतकरी श्री. भगवान हरी पाटील. यांच्या मातोश्री ग.भा.भागीरथीबाई हरी पाटील. वय वर्षे ९५ यांनी योग्य उपचार घेऊन आपल्या इच्छाशक्तीच्या जोरावर कोरोनासारख्या आजाराला पळवून लावत आज ठणठणीत बऱ्या होऊन घरी परतल्या आहेत.
याबाबत सविस्तर वृत्त असे की पाचोरा तालुक्यातील कुऱ्हाड खुर्द व कुऱ्हाड बुद्रुक गावात कोरोनाची लागण होऊन रुग्णसंख्या झपाट्याने वाढत होती. याच कोरोनाच्या लाटेत कुऱ्हाड बुद्रुक येथील प्रगतीशील शेतकरी श्री. भगवान हरी पाटील. यांच्या घरातही कोरोनाने प्रवेश करत यात भगवान पाटील त्यांच्या धर्मपत्नी, मोठाभाऊ त्यांच्या धर्मपत्नी, नातसुन, नातु व ग.भा.भागरथीबाई यांना कोरोनाची लागण झाल्याचे उघड झाले.
संपूर्ण कुटुंबातील सदस्यांना कोरोनाची लागण झाल्याने काही वेळ सगळ्याच्यांच पायाखालची वाळू सरकली परंतु आपल्या घरातील आजीबाईंनी घाबरून न जाता संपूर्ण परिवाराला आधार देत वेगवेगळ्या दवाखान्यात उपचारासाठी पाठवले यापैकी भगवान पाटील हे जामनेर येथील शासकीय रुग्णालयात उपचार घेऊन कोरोनामुक्त झाले व ९५ वर्षे वयाच्या आजीबाईं जळगाव सिव्हिल हॉस्पिटलमध्ये उपचार घेत मागील दोन दिवसापूर्वीच कोरोनाला हरवत ठणठणीत होऊन घरी परतल्या.
कोरोनाची लागण झाल्यानंतर कोणीही घाबरून न जाता योग्यवेळी योग्य उपचारपद्धती व सकस आहार घेतल्यास कोरोना हा आजार परिपूर्ण बरा होऊ शकतो. असा संदेश दिला. जळगाव सिव्हिल हॉटेलमध्ये चांगल्याप्रकारे चोवीस तास उपचार मिळतात तेथील डॉक्टर व त्यांचे सहकारी रात्रंदिवस मेहनत घेऊन मानसिक आधार देतात परकेपणाची जाणीव होऊ देत नाहीत म्हणून औषधोपचारासोबत डॉक्टर व त्यांच्या सहकाऱ्यांनी दिलेला मानसिक आधारामुळे माझ्या मनातील कोरोनाची भीती दुर झाली व मी ठणठणीत होऊन घरी परतली असे आजीबाईंनी सांगितले तसेच उपचारादरम्यान पाचोरा येथील डॉ. विकास केजरीवाल यांच्याकडून औषधोपचार व मार्गदर्शन घेतले होते याचा पूरेपूर फायदा झाल्याचे आजीबाईंनी सांगितले.