मकरंद कुलकर्णी.(जळगाव)
दिनांक~३०/११/२०२५

समाजात एचआयव्ही/एड्सबाबत जनजागृती होऊन प्रतिबंधात्मक उपायांना चालना मिळावी, या उद्देशाने दरवर्षी १ डिसेंबर हा दिवस जागतिक एड्स नियंत्रण दिन म्हणून पाळण्यात येतो. यानिमित्त जिल्हा एड्स नियंत्रण व प्रतिबंधक समिती तसेच सामान्य रुग्णालय, जळगाव यांच्या संयुक्त विद्यमाने १ डिसेंबर रोजी जागतिक एड्स दिन आणि जनजागृती पंधरवड्याच्या प्रारंभानिमित्त प्रभातफेरी व विविध कार्यक्रमांचे आयोजन करण्यात आले आहे.

१ डिसेंबर ते १५ डिसेंबर या कालावधीत जिल्हा एड्स नियंत्रण व प्रतिबंधक पथक, शासकीय वैद्यकीय महाविद्यालय व रुग्णालय, जळगाव यांच्या माध्यमातून जिल्हा व तालुकास्तरावर व्यापक जनजागृतीपर उपक्रम राबविण्यात येणार आहेत. यामध्ये यंदा कौटुंबिक तपासणी तसेच गाव पातळीवर विशेष आरोग्य शिबिरे या योजना नव्याने राबविण्यात येणार असून, एचआयव्ही तपासणी व समुपदेशन सेवांवर विशेष भर दिला जाणार आहे.

या पंधरवड्यात जनजागृतीसाठी रांगोळी, कविता, चित्रकला स्पर्धा, निबंध लेखन, जनजागृती प्रभातफेरी, पथनाट्य, पोस्टर प्रदर्शन अशा विविध उपक्रमांचे आयोजन करण्यात आले आहे. यासोबतच ट्रक चालक, वाहक व त्यांच्याशी निगडीत कर्मचारी यांचे विशेष मेळावे, स्थलांतरित कामगारांसाठी जनजागृती कार्यक्रम, भगिनी मेळावे तसेच एचआयव्हीसह जगणाऱ्या व्यक्तींकरिता वधू-वर परिचय मेळावे व शासकीय योजनांची माहिती देणारे मेळावेही घेण्यात येणार आहेत.

या सर्व उपक्रमांतून एचआयव्ही/एड्सबाबत समाजातील गैरसमज दूर करणे, वेळेवर तपासणीचे महत्त्व पटवून देणे आणि बाधित व्यक्तींना सामाजिक आधार देणे हा मुख्य उद्देश असल्याचे जिल्हा शल्य चिकित्सक डॉ. किरण पाटील यांनी प्रसिद्धीपत्रकाद्वारे कळविले आहे. जनतेने या उपक्रमांमध्ये मोठ्या संख्येने सहभागी होऊन जागतिक एड्स नियंत्रण दिनाच्या जनजागृती मोहिमेला हातभार लावावा, असे आवाहनही त्यांनी केले आहे.