दिलीप जैन.(पाचोरा)
दिनांक~१४/११/२०२५

राज्यातील २४६ नगरपरिषदा आणि ४२ नगरपंचायतींच्या सार्वत्रिक निवडणुका २०२५ साठी नामनिर्देशन दाखल करण्याची प्रक्रिया सुरू असताना संगणक प्रणालीमध्ये उद्भवलेल्या अडचणींना लक्षात घेऊन राज्य निवडणूक आयोगाने उमेदवारांना मोठा दिलासा दिला आहे. येत्या १५ ते १७ नोव्हेंबर या कालावधीत ऑनलाईनसोबतच ऑफलाईन पद्धतीनेही नामांकन पत्र स्वीकारण्याचे आदेश देण्यात आले आहेत.

आयोगाचे याबाबतचे परिपत्रक गुरुवारी जारी करण्यात आले. निवडणूक कार्यक्रम ४ नोव्हेंबर रोजी जाहीर झाल्यापासून नामांकन प्रक्रिया केवळ ऑनलाईन पद्धतीने सुरू होती. मात्र, मागील काही दिवसांपासून संगणक प्रणालीवर तांत्रिक अडथळे निर्माण झाल्याची माहिती आयोगाच्या निदर्शनास आल्यानंतर उमेदवारांची गैरसोय टाळण्यासाठी हा महत्वाचा निर्णय घेण्यात आला आहे.
=========================================================
रविवारीही नामांकन दाखल करता येणार.
=========================================================
निर्देशांनुसार १५, १६ आणि १७ नोव्हेंबर—तीन्ही दिवस, रविवार १६ नोव्हेंबर हा सार्वजनिक सुट्टीचा दिवस असला तरीही, उमेदवारांना सकाळी ११ ते दुपारी ३ या वेळेत नामनिर्देशन दाखल करता येणार आहे. यामध्ये ऑनलाईनसोबतच पारंपारिक ऑफलाईन पद्धतीचा पर्याय खुला ठेवण्यात आला आहे.

उमेदवारांनी आवश्यक कागदपत्रांसह संबंधित निवडणूक निर्णय अधिकारी (RO) यांचेकडे अर्ज दाखल करावेत, असे स्पष्ट निर्देश देण्यात आले आहेत. संगणक प्रणालीवर वाढत्या भारामुळे शेवटच्या क्षणी उमेदवारांची अडचण होऊ नये आणि सर्वांना समान संधी उपलब्ध व्हावी, हा आयोगाचा उद्देश असल्याचे पत्रात म्हटले आहे.
=========================================================
जिल्हाधिकाऱ्यांना सूचना प्रसारित करण्याचे आदेश.
=========================================================
राज्यभरातील जिल्हाधिकाऱ्यांनी आपल्या स्तरावरून तातडीने सूचना जारी करून ही माहिती सर्व उमेदवार, पक्ष आणि मतदान क्षेत्रांपर्यंत पोहोचवावी, असेही निर्देश देण्यात आले असून परिपत्रकाची प्रत सर्व विभागीय आयुक्त, मुख्याधिकारी, संबंधित नगरपरिषद, नगरपंचायत जिल्हा पोलीस अधीक्षक, आयुक्त, यांच्याकडे आवश्यक कार्यवाहीसाठी पाठविण्यात आली असून राज्य निवडणूक आयुक्त यांच्या आदेशानुसार हे पत्र सचिव सुरेश काकाणी यांनी जारी केले.

यामुळे निवडणूक प्रक्रियेला गती, नामांकनासाठी ऑनलाइनसोबत ऑफलाइनचीही सुविधा. राज्यातील २४६ नगरपरिषद व ४२ नगरपंचायतींच्या सार्वत्रिक निवडणुकांसाठी राज्य निवडणूक आयोगाचा महत्त्वाचा निर्णयामुळे या निर्णयाचे स्वागत केले जात आहे.