दिलीप जैन.(पाचोरा)
दिनांक~०७/११/२०२५

पाचोरा पोलीस ठाण्याच्या गुन्हे शोध पथकाने केवळ चार तासांच्या आत चोरीचा गुन्हा उघडकीस आणत आरोपीस जेरबंद करून चोरी गेलेली मोटारसायकल हस्तगत करण्यात यश मिळवले आहे. गुन्हेगारी रोखण्यासाठी आणि नागरिकांचा पोलिसांवरील विश्वास वाढवण्यासाठी ही कारवाई अत्यंत कौतुकास्पद ठरली आहे.

मिळालेल्या माहितीनुसार, दिनांक ४ नोव्हेंबर २०२५ रोजी दुपारी साडेएकच्या सुमारास फिर्यादी मनोज डिगंबर जाधव (वय ३०, व्यवसाय – मेडिकल, रा. भोजे चिंचपुरे, ता. पाचोरा) यांनी जारगाव चौफुली येथे त्यांची बजाज कंपनीची काळ्या रंगाची प्लॅटीना मोटारसायकल (क्रमांक MH-19 CP-0869) पार्क केली होती. दरम्यान, फळ घेण्यासाठी गेले असता अज्ञात चोरट्याने संमतीशिवाय मोटारसायकल लंपास केली. याबाबत पाचोरा पोलीस ठाण्यात गुन्हा रजि. क्रमांक ५१२/२०२५, भारतीय न्याय संहिता सन २०२३ चे कलम ३०३(२) प्रमाणे दाखल करण्यात आला.

गुन्ह्याचा तपास सुरू असताना गुन्हे प्रकटीकरण शाखेचे पोलीस हेडकॉन्स्टेबल. राहुल काशिनाथ शिंपी, योगेश सुरेश पाटील, शरद मांगो पाटील, गणेश प्रल्हाद कुवर व श्रीराम अनिल शिंपी यांनी तांत्रिक विश्लेषणासह सीसीटीव्ही फुटेज तपासले. दरम्यान, पोलीस कॉन्स्टेबल योगेश पाटील यांना गुप्त बातमीदारामार्फत कृष्णपुरी परिसरात संशयित फिरत असल्याची माहिती मिळाल्याने पथकाने तत्काळ कारवाई केली.

सदर ठिकाणी दबा धरून बसलेल्या पथकाने संशयित इसमास पकडले. चौकशीअंती त्याने स्वतःचे नाव भगवान लक्ष्मण पाटील (वय ३५, रा. पिंप्री खुर्द, ता. पाचोरा, जि. जळगाव) असे सांगितले. पुढील चौकशीत त्याने गुन्ह्याची कबुली दिली. त्याच्याकडून चोरी गेलेली अंदाजे ४५ हजार रुपयांची बजाज प्लॅटीना मोटारसायकल जप्त करण्यात आली. आरोपीस अटक करण्यात आली असून, पुढील तपास पोलीस हेडकॉन्स्टेबल राहुल काशिनाथ शिंपी करीत आहेत.

ही उल्लेखनीय कामगिरी मा. पोलीस अधीक्षक श्री. महेश्वर रेड्डी, अप्पर पोलीस अधीक्षक चाळीसगाव परिमंडळ श्रीमती कविता नेरकर, तसेच उपविभागीय पोलीस अधिकारी श्री. बापू रोहम यांच्या मार्गदर्शनाखाली पोलीस निरीक्षक श्री. राहुलकुमार पवार यांच्या नेतृत्वाखाली पार पडली.

चार तासांत आरोपीला गजाआड गुन्हे शोध पथकाच्या वेगवान तपासामुळे नागरिकांत समाधानाचे वातावरण.