दिलीप जैन.(पाचोरा)
दिनांक~१७/०१/२०२५

दुध हे पूर्ण अन्न आहे व आरोग्याच्या दृष्टिकोनातून दूध हे शरीरासाठी खूप उपयुक्त असून मोठ्या प्रमाणावर दुधाचा वापर लहान बालकांपासून ते वयोवृद्ध व्यक्तींपर्यंत पिण्यासाठी केला जातो. परंतु सद्यस्थितीत दुधातील भेसळीचे प्रकार राज्यात निदर्शनास येत आहेत. म्हणून अन्न व औषध प्रशासन, महाराष्ट्र राज्य, अन्न सुरक्षा व मानके कायदा २००६ नियम व नियमन २०११ ची अंमलबजावणी करुन राज्यातील नागरिकांना सकस व निर्मळ अन्नपदार्थ उपलब्ध करुन त्यांचे जीवनमान उंचावण्यासाठी शासन विविध उपाययोजना करीत आहे.

याचाच एक भाग म्हणून दुध व दुग्धजन्य पदार्थांची भेसळ करणाऱ्यांवर जरब बसविण्याकरीता व भेसळ रोखण्यासाठी तसेच राज्यातील जनतेला उपलब्ध होणारे दुध व दुग्धजन्य पदार्थांची गुणवत्ता तपासण्यासाठी मा. मुख्यमंत्री देवेंद्रजी फडणवीस तसेच अन्न व औषध प्रशासन मंत्री मा. नरहरी झिरवाळ, आयुक्त राजेश नार्वेकर यांच्या मार्गदर्शनाखाली प्रशासनामार्फत संपूर्ण राज्यात व्यापक स्वरूपात मोहीम राबविण्यात आली असल्याची माहिती समोर येत आहे.

या माहितीनुसार दोन दिवसांपूर्वी राज्यभर विविध ठिकाणी मोहीम राबविण्यात आली असून या मोहिमेत ठिकठिकाणी दुधाचे सर्वेक्षण नमुने घेऊन त्यांचा गुणवत्तेची तपासणी करण्यासाठी एकुण १०३ अन्न सुरक्षा अधिकाऱ्यांना सूचना देण्यात आल्या होत्या. या सुचनेनुसार राज्यभरातील अन्न व सुरक्षा अधिकाऱ्यांनी दुध उत्पादक, दुध वितरक, विक्रेते व रस्त्यांवरील विक्री केंद्रावरुन १०६२ दुधाचे नमुने सर्वेक्षण विश्लेषणाकरीता घेतले असून यात राज्यात विविध ब्रांडचे दुधाचे ६८० पिशव्या (पाऊच) पॅकिंग मधुन व ३८२ सुट्या स्वरुपातील दुधाच्या नमुन्यांचा समावेश आहे.

सदरचे घेतलेले दुधाचे नमुने अन्न सुरक्षा व मानके प्राधिकृत अन्न प्रयोगशाळेत पाठविण्यात आले असून या दुधामध्ये भेसळ, रसारनांचे प्रमाण व दुधाच्या गुणवत्तेची तपासणी केली जाईल. सदर सर्वेक्षण नमुने विश्लेषणांती दुधाच्या नमुन्यांमध्ये भेसळ आढळून आल्यास सदर आस्थापनेमधुन तात्काळ कायदेशीर नमुने घेऊन संबंधित उत्पादक व पुरवठादार यांचेवर अन्न सुरक्षा व मानके कायद्यानुसार तात्काळ कठोर कारवाई करण्याचे आदेश प्रशासनामार्फत अधिकाऱ्यांना देण्यात आले आहेत.
**************************************************
अन्न व औषध प्रशासनाचे आयुक्त, राजेश नार्वेकर.
**************************************************
अन्न व औषध प्रशासनाचे आयुक्त राजेश नार्वेकर यांनी याविषयी बोलताना सांगितले की, “दूधातील भेसळ ही गंभीर समस्या आहे. नागरिकांच्या आरोग्यावर होणारा परिणाम टाळण्यासाठी मुख्यमंत्री तसेच विभागाचे मंत्री राज्यमंत्री यांनी दुध भेसळ हा विषय गांभीर्याने घेतला असून भेसळ करणाऱ्या व्यक्तींविरोधात कठोर कारवाई घेण्याचे निर्देश दिले आहेत. त्यानुषंगाने आज राज्यभरात दुधाचे सर्वेक्षण नमुने घेण्याची मोहीम राबविण्यात आली आहे.

सदर नमुन्यांमध्ये भेसळ आढळल्यास तात्काळ संबंधित दुधाचे विक्रेते. पुरवठादार व उत्पादक यांचे विरुद्ध कारवाई करण्याचे आदेश अधिकाऱ्यांना देण्यात आले आहेत. तसेच अशाप्रकारच्या मोहिमा वारंवार घेण्यात येतील. तसेच या मोहिमेसाठी नागरिकांचे सहकार्य अपेक्षित असून दुधात किंवा दुग्धजन्य पदार्थांमध्ये भेसळ आढळून आल्यास अन्न व औषध प्रशासनाच्या [१८००२२२३६५] हेल्पलाईन क्रमांकावर संपर्क साधावा किंवा [email protected] या ईमेलवर किंवा https://foscos.fssai.gov.in/consumergrievance या पोर्टलवर तक्रार नोंदवावी. असे आवाहन केले आहे.