दिलीप जैन.(पाचोरा)
दिनांक~२५/११/२०२४

महाराष्ट्र पोलीस विभागाकडून महिला, मुली, जेष्ठ नागरिक तसेच काही गंभीर प्रसंगी मदतीसाठी ११२ हा नंबर देण्यात आला असून या नंबरवर फोन करताच उन वारा पाऊस व दिवसरात्र याचा विचार न करता काही वेळातच पोलीस घटनास्थळी दाखल होतात. परंतु काही विध्नसंतोषी लोक याच ११२ नंबरवर फोन करुन मुद्दामहून पोलीसांना त्रास देण्याच्या हेतूने फोन करत असल्याचे प्रमाण दिवसेंदिवस वाढत चालले आहे.

असाच काहीसा प्रकार दिनांक २४ नोव्हेंबर २०२४ रविवार रोजी रात्री सव्वा नऊ वाजता पाचोरा शहरात घडला असून भ्रमणध्वनी क्रमांक ७७९८८४४४९८ या क्रमांकावरुन एका अज्ञात व्यक्तीने ११२ या क्रमांकावर फोन करुन सांगितले की पाचोरा शहरातील जारगाव चौफुली येथे १५० ते २०० लोक एका विशिष्ट समाजाच्या लोकांना मारहाण करत आहेत त्यापैकी दोन लोकांचा खुन झाला असून चॉपर सारख्या हत्याराचा वापर करण्यात आला आहे. तुम्ही तात्काळ पोलीस पाठवा असे सांगितले होते.

पाचोरा पोलीस स्टेशनचे कर्मचारी निवडणूकीचा महत्वाचा बंदोबस्त आटोपल्यावर सकाळी पुन्हा कर्तव्यावर हजार करुन घेत कर्तव्यावर हजार होताच आलेल्या फोनचे गांभीर्य ओळखून पाचोरा पोलीस स्टेशनकडील पोलीस कर्मचाऱ्यांना तात्काळ घटनास्थळी जाऊन आलेला फोन व मिळालेल्या माहितीनुसार सदर ठिकाणी सखोल चौकशी केली असता सदर ठिकाणी कोणतीही घटना घडलेली नव्हती

म्हणून शहानिशा करण्यासाठी ज्या भ्रमणध्वनीवरुन फोन आला होता त्या फोन केलेल्या इसमाचा भ्रमणध्वनीवरुन शोध घेतला असता शैलेश रविंद्र पाटील राहणार तामसवाडी तालुका पारोळा जिल्हा जळगाव हा जारगाव चौफुलीवर मिळून आला त्यास या घटनेबाबत विचारपूस केली असता त्याने सांगितले की मी मुद्दामहून पोलीस स्टेशनला फोन केलेला आहे व तशी कोणतीही घटना घडलेली नाही.

अशी माहिती समोर येताच नागरिकांना व पोलीसांना त्रास व्हावा या हेतूने मुद्दामहून ११२ या नंबरवर फोन करुन खोटी माहिती दिली म्हणून शैलेश रविंद्र पाटील राहणार तामसवाडी, तालुका पारोळा, जिल्हा जळगाव यांच्या विरोधात दिनांक २४ नोव्हेंबर २०२४ रविवार रोजी भारतीय न्याय संहिता २०२३ चे कलम २१२ अन्वये गुन्हा दाखल करण्यात आला असून पुढील तपास पोलीस उपनिरीक्षक सुनील पाटील हे करीत आहेत.
*************************************************
पाचोरा पोलीसांचे जनतेला आवाहन.
**************************************************

महाराष्ट्र पोलीस दलातर्फे ११२ हा क्रमांक महिला, मुली, जेष्ठ नागरिकांकरीता तसेच गंभीर प्रसंगी तात्काळ मदत मिळावी म्हणून उपलब्ध करुन देण्यात आलेला असून महिला, मुली, जेष्ठ नागरिक व गंभीर प्रसंगीच पोलीसांना ११२ नंबरवर फोन करावा असे आवाहन पाचोरा पोलीस स्टेशन कडून सर्व नागरिकांना करण्यात आले आहे.