दिलीप जैन.(पाचोरा)
दिनांक~११/११/२०२४

पाचोरा मतदारसंघातील व्यापारी बांधवांच्या उद्योग वाढीसाठी मूलभूत सुविधांसोबतच भयमुक्त वातावरणामुळे व्यापार वाढीला प्रत्यक्ष, अप्रत्यक्ष मदत झाली असून आपण पाचोरा शहरातील व्यापारी बांधवांच्या मागणीनुसार सर्व सुविधा युक्त भव्य असे व्यापारी भवन पाचोरा शहराच्या मध्यवर्ती ठिकाणी निर्माण करु शकलो याचे मला मनस्वी समाधान असल्याची भावना आमदार किशोर आप्पा पाटील यांनी पाचोरा शहरातील जैन पाठशाळेत काल रविवार रोजी सायंकाळी सहा वाजता संपन्न झालेल्या व्यापारी मेळाव्यात बोलून दाखवली तसेच यापुढेही मी व्यापारी बांधवांच्या उद्योग वाढीसाठी व येणाऱ्या अडिअडचणी सोडवण्यासाठी कट्टीबद्व असल्याचे आश्वासन यावेळी दिले.

या व्यापारी मेळाव्याप्रसंगी मंचावर गांधीनगर महापालिकेचे उपमहापौर भारतीय जनता पक्षाचे निरिक्षक प्रेमळसिंह गोल, भारतीय जनता पक्षाचे जिल्हा उपाध्यक्ष, मधुकर भाऊ काटे, कांतीलाल जैन, मुन्ना राजपूत, नंदू सोमवंशी, संजय गोहिल, शरद पाटील, राम केसवानी, विनय सेठ, बापू सोनार, आदी मान्यवर उपस्थित होते.

पुढे बोलतांना आमदार किशोर आप्पा पाटील म्हणाले की व्यापारी आणि माझे नेहमीच जवळचे संबंध राहिले असल्याने वेळोवेळी समजून आलेल्या समस्या जाणून घेत मी व्यापारी बांधवांच्या अडचणी सोडविण्यासाठी सतत प्रयत्न केले आहेत. याच प्रयत्नातून व्यापारी बांधवांच्या अडचणी समजून घेत पाचोरा शहरात मध्यवर्ती ठिकाणी भव्य अशा व्यापारी भवनाची निर्मिती करुन व्यापाऱ्यांना दिलेला शब्द पुर्ण केला आगामी काळातही व्यापाऱ्यांच्या पाठीशी खंबीरपणे उभा राहिल अशी ग्वाही दिली. भविष्यात पाचोरा शहरात छोट्या व्यावसायिकांच्या उद्योग, व्यवसायाला चालना देण्यासाठी व्यापारी संकुल उभारणार असल्याचे असल्याचे सांगितले.