दिलीप जैन.(पाचोरा)
दिनांक~०२/०७/२०२४

पाचोरा तालुक्यातील बऱ्याचशा खाजगी शैक्षणिक संस्थांमध्ये अनागोंदी कारभार सुरु असून या अनागोंदी कारभारामुळे सर्वसामान्य कुटुंबातील शिक्षण घेत असलेल्या विद्यार्थ्यांना अनेक अडिअडचणींना सामोरे जावे लागत असून बऱ्याचशा विद्यार्थ्यांचे शैक्षणिक नुकसान होऊन गुणवत्तेवर परिणाम होत असल्याने पालक वर्गातून संतप्त प्रतिक्रिया व्यक्त केल्या जात आहेत.

अशीच एक घटना आज पाचोरा तालुक्यातील पिंपळगाव हरेश्वर येथील ग्रामविकास माध्यमिक विद्यालयात घडली असून दिनांक ३० जून २०२४ रविवार रोजी नुकतेच सेवानिवृत्त झालेले मुख्याध्यापक प्रमोद महाजन यांनी सेवानिवृत्त झाल्यानंतर ग्रामविकास माध्यमिक विद्यालयाचे सर्व कागदपत्रे, सेवा पुस्तके व इतर महत्त्वाची कागदपत्रे व जबाबदारी नवनियुक्त मुख्याध्यापक मा. श्री. पुंडलिक जगन्नाथ तेली यांच्याकडे देणे गरजेचे व नियमानुसार क्रमप्राप्त असल्यावरही सेवानिवृत्त त्यांनी संस्थेकडे त्यांचे ९३०००/०० हजार रुपये घेणे असल्याच्या वैयक्तिक वादविवादातून मनमानी कारभार करत लिपिक कार्यालयाला व महत्त्वाचे कागदपत्रे असलेले ड्रावर व कपाटाच्या चाव्या नवनियुक्त मुख्याध्यापकांकडे सुपुर्द न करता घरी निघून गेल्यामुळे विद्यालयाच्या कामकाजात अडथळा निर्माण झाला आहे.

विशेष बाब म्हणजे नुकतेच इयत्ता दहावी व बारावी उत्तीर्ण झालेल्या विद्यार्थ्यांना पुढील शिक्षणासाठी शाळा सोडल्याचा दाखला व गुणपत्रक अत्यंत गरजेचे आहे. कारण या नुकत्याच उत्तीर्ण झालेल्या विद्यार्थ्यांना वेगवेगळ्या कॉलेज, वेगवेगळे डिग्री, डिप्लोमा कोर्स करण्यासाठी व
वेगवेगळ्या शिक्षणासाठी ठराविक वेळात प्रवेश घेणे अत्यंत गरजेचे असून संस्थेच्या सेवानिवृत्त मुख्याध्यापकांच्या वैयक्तिक वादातून ऐनवेळी ग्रामविकास माध्यमिक विद्यालयातून कागदपत्रे न मिळाल्याने जवळपास पन्नास ते साठ विद्यार्थ्यांना आज दिनांक ०२ जूलै २०२४ मंगळवार रोजी खाली हात परत जावे लागले असल्याने गोरगरिबांच्या मुलांना नहाकच आर्थिक भुदंड व मानसिक ताण सहन करावा लागला आहे.

या सेवानिवृत्त मुख्याध्यापकांनी केलेल्या गैरवर्तणूकीमुळे विद्यार्थ्यांना जर वेळेवर कागदपत्रे मिळाली नाहीत तर त्याचे मोठे शैक्षणिक नुकसान होण्याची शक्यता नाकारता येत नाही. म्हणून ग्रामविकास माध्यमिक विद्यालयाच्या आजच सेवानिवृत्त मुख्याध्यापक प्रमोद महाजन यांच्या विरोधात ग्रामविकास माध्यमिक विद्यालयाचे अध्यक्ष मा. श्री. प्र. बा. पाटील संचालक मा. श्री. भास्कर पाटील, मा. श्री. जनार्दन देव, मा. श्री. कडूबा तेली, मा. श्री. सुरेश बडगुजर व मा. श्री. दिलीप जैन यांनी पिंपळगाव हरेश्वर पोलीस स्टेशनला रितसर तक्रार दाखल केली असून या तक्रारीत त्यांनी सेवानिवृत्त मुख्याध्यापक मा. श्री. प्रमोद महाजन यांनी महत्त्वाची कागदपत्रे घेऊन गेले असावेत असा संशय व्यक्त केला आहे.

या तक्रारीची दखल घेत पिंपळगाव हरेश्वर पोलीस स्टेशनचे सहाय्यक
पोलीस निरीक्षक मा. श्री. चंद्रशेखर पालकर व त्यांचे सहकारी हे उद्या दिनांक ०३ जूलै २०२४ बुधवार रोजी ग्रामविकास माध्यमिक विद्यालय जाऊन सत्य परिस्थिती जाणून घेत रितसर पंचनामा करुन पुढील कारवाई करणार असल्याचे खात्रीलायक वृत्त आहे.
_______________________________________________________________
*सेवानिवृत्त मुख्याध्यापकांची शिरजोरी*
सेवानिवृत्त मुख्याध्यापक प्रमोद महाजन यांनी सत्यजित न्यूजचे संपादक दिलीप जैन यांना आपले बोलणे रेकॉर्ड होऊ नये म्हणून व्हाट्सअपच्या माध्यमातून व्हाइस कॉल करत तुम्ही आमची बातमी का लावली अशी रागाच्या भरात विचारणा करत हुज्जत घालण्याचा प्रयत्न करुन एकप्रकारे प्रसारमाध्यमांवर दबाव टाकण्याचा केविलवाणा प्रयत्न केला आहे.
________________________________________________________________