दिलीप जैन.(पाचोरा)
दिनांक=२५/११/२०२०
नुकत्याच मिळालेल्या माहितीनुसार भारतीतील काही राज्यांत गेल्या काही दिवसांत कोरोना बाधितांची संख्या वाढत असल्याचं पहायला मिळत आहे. कोरोनाचा वाढता प्रादुर्भाव लक्षात घेता सरकारने काळजी आणि खबरदारी घेण्याचे आवाहन करत नव्या मार्गदर्शक सूचना जाहीर केल्या आहेत. या संदर्भात गृह मंत्रालयाने आदेश जारी केले आहेत. यानुसार नव्या मार्गदर्शक सूचना १ डिसेंबर २०२० पासून ३१ डिसेंबर २०२० पर्यंत लागू राहणार आहेत. केंद्रीय गृह मंत्रालयाकडून जाहीर करण्यात आलेली मार्गदर्शक तत्वांचे मुख्य लक्ष म्हणजे कोविड-१९चा वाढता प्रादुर्भाव रोखणे असा आहे.
काही राज्यांत / केंद्रशासित प्रदेशांमध्ये गेल्या काही दिवसांत कोरोना बाधितांच्या संख्येत वाढ होताना दिसत आहे. सणासुदीच्या काळात तसेच हिवाळ्यात कोरोनावर पूर्णपणे मात करण्यासाठी सावधगिरी बाळगणे आणि विशेष काळजी घेण्यावर जोर देण्याची आवश्यकता आहे. तसेच नियमांचे काटेकोरपणे पालन करणे आवश्यक आहे.
गृह मंत्रालय आणि आरोग्य व कुटुंब कल्याण मंत्रालयाने जारी केलेल्या मार्गदर्शक सूचना / एसओपीमध्ये कोरोनावर नियंत्रण आणि नियमांची काटेकोर अंमलबजावणी, देखरेखीवर लक्ष केंद्रित केले आहे. या उपाययोजनांचे काटेकोर पालन करण्याची, अंमलबजावणी पूर्ण करण्याची जबाबदारी जिल्हा प्रशासन, पोलीस आणि महानगरपालिका अधिकाऱ्यांवर असणार आहे.
कोविड १९ संदर्भात एसओपीचे कठोर पालन आवश्यक
कंटेन्मेंट झोनमध्ये केवळ अत्यावश्यक कार्यालाच परवानगी दिली जाईल
कोविड तपासणीसाठी स्थापन करण्यात आलेल्या पथकांद्वारे घरोघरी निरीक्षण केले जाईल
निर्धारित प्रोटोकॉलनुसार चाचणी करण्यात येईल
फेस मास्क परिधान करणे अनिवार्य आहे
सोशल डिस्टंसिंगचे पालन करणे अनिवार्य आहे
कोविड-१९ बाधित आढळल्यास तात्काळ विलगिकरणात ठेवणे, उपचार सुरू करणे
एका राज्यातून दुसऱ्या राज्यात जाण्यास बंदी नाही
व्यवसायासाठी एखादी व्यक्ती / वस्तू एका राज्यातून दुसऱ्या राज्यात जाण्यास कुठलीही बंदी नाही. अशा प्रकारच्या प्रवासासाठी कुठल्याही प्रकारच्या ई-पासचीही आवश्यकता नाहीये.
वयोवृद्ध / लहान मुलांची विशेष काळजी
वयोवृद्ध व्यक्ती अर्थात ६५ वर्षांहून अधिक वय असलेले व्यक्ती, गरोदर महिला आणि १० वर्षांहून कमी वय असलेल्या मुलांना घरीच थांबवण्याचा सल्ला देण्यात आला आहे.